قصيدة الوقيعه

موضوع: قصيدة الوقيعه الجمعة يناير 09, 2009 11:55 am

قصيدة الوقيعه(1)

لكلك حواديت الجده ونام
وكفاية كلام..
أنا ياما بكيت
وهجير الشمس
وهيَّ بتلسع ف العراقيب
قباقيب الدّيب
عَمّالهْ تبرطع وتنجّس
فدادين القمح الدبلانة
وكلاب النجع النعسانة
معادتش تَعَوْعِوْ
زي زمان..
ولا عادت تُحرس
غنماتي قدّام الباب
تِشْتَرّ الخوف
اللي معشش جُوّا الأنفاس
والناس..
مكسورة ، وضاقت خطاويها
علشان الديب
من بعد أذان المغرب
حافــي
وف إيديه القباقيب
والنّاس فرُّوج
دايخ من مرض الهُتّ ^([1])
والفكر مبعزق .. ومبعتر ..
ويشيل .. ويحطّ
أفكار مسلوبة ومعدومة..
وحبال في سباتة بوص^([2])
والسوس بينخُر جوّاها
ما هي أصل قديمة ، ومرميّة
وأنا قلبي مشعلل ف ضلوعي
ودموعي
محبوسة ورافضة الحريّة ..
الديب كان ساكن حكاوينا
من عمر طويل..
والليل هلاهيل
مش قادر يستر عورتنا
ولسّاه بيعافر ..
لكن ..!!
مين يقدر يدَّارَى
في الأرض البور ؟!
م الشمس الحامية
اللي بتلسع زيّ الدبّور
وف عزّ البرد
ياما كُنت بعسعس على بورة
أو كرنيفة ⁽^[sup][3][/sup]⁾نخلة قديمة
أو حتى جريدة بسعفتها
وأقيد النار
من برد اْمشير وزعابيبه
أنا كنت بنام
والأرض حاسسها بتكويني
زي السلاّع ^([4])
والديب بيبرطع ..
مش لاقي حدّ يقول: حاص
هُوَّه البلاص
ممكن نتوقع يبقالو
عقل وإحساس
دي حاجات مركونة ومنسية
وأنا قلبي مشعلل ف ضلوعي
ودموعي ..
محبوسة ورافضة الحريّة ..
يا جاموسِة ستّي
اللي اتباعت من غير مواعيد
خدها الجزّار
وقالِــــــلْــــنَا : وقيعة
ويا دوبك حتّه بخمسين
يا سنين
عضماية وبتشوِّك
جُوّا الحلقوم
معرفش العاتق يسحبها
وَقَفَتْ ف الزور .. المرزية
وأنا قلبي مشعلل ف ضلوعي
ودموعي ..
محبوسة ورافضة الحريّة..
اكرم عبد السميع /البلينا

1) الهُتّ : مرض يصيب الدّجاج.
1) سباتة بوص: عيدان من الذرة تُربط وتُرصّ فتصبح كجدار.
1) الجزء الأسفل من جريد النخل.
1) السلاع: شوك النخيل.

» قصيدة المقلاع
» قصيدة قيود !!
» قصيدة المخاض ...
» قصيدة السهرايه
» قصيدة بعدالعسريسرا