رائعة اكرم عبد السميع/ أخر مشوار

رائعة اكرم عبد السميع
قصيدة ( أخر مشوار )

على طول بتسافر
وطويت السكك الوعرانة لسنين طوال
سبعين سنة عَدِّت
واتمدت فيها الأحزان
ولا عُمري سمعتك قلت الآه
بتشابط كل دروب اليأس
والاقيهم دايماً يرفعوا إيدك
إنك فايز
وباحسك عايز
طول العمر تكون رحّال
كان آخر مرّة سافرت الشهر الفات
خطواتك ضاقت
مش زي الأول
دا أنا كنت باشوفك
تحصد كل خطاوي تعنقل رجلك
ولا كان يهمّك برد ورعد
ولا كنت تخاف من رياح الخماسين
على طول أنا شايفك
فارس ف الخمسة وتلاتين
بس المرّة دي
كان باين
إن دراع الزمن مشبّح فوق عراقيبك
مع إنك واتق
زي الجبل الغربي
مهما تكسِّر فيك لسنين
برضه متين ..
بتجرجر رجلك وتعاند
وباشوفك ساند
فوق سراديب الأمل إيديك
وعنيك ..
مليانة آيات .. تحتاج تفسير
والله ما كنت مصدّق
إن دي آخر مرة تسافر فيها
ولغاية دَلْوَك ^([1]).. ولبكرة .. ولعشر سنين
مش هقدر أصدّق
إنّ دا كان آخر مشوار
يعني خلاص
قطّعت أوراق السفر ف زرعك
مش ناوي العودة
ولاّ هقعد فوق الجسر
أستنى رجوعك
وأنا قاعد أفْرِز
كُلّ (أوتومبيل) يعدِّي
وابحلق فيه ..
وأشوفك جاي
وتاخدني ف حضنك
كان عمري يا دوبك سبع سنين
بس الإحساس اللي ف قلبي
مش قادر أنساه
إمبارح .. وأنا عمري خلاص
عدَّى التلاتين
قاعد فوق الجسر
مستني رجوعك
زيّ زمان
تجيب لي البخت
أتاريني انا ناسي
إنك من أربع تيّام
ودَّعت ..
ومش ناوي تعود
وكأنك عارف
إن نهاية القصة خلاص
وإن الإخلاص
لامم أوراقُه
وراحل ..
اكرم عبد السميع

البلينا / نجع مازن غرب

1) دلْوك : الآن.

أستاذنا وشاعرنا الكبير

أكرم عبد السميع

تسلم ايدك والله ..... ولا أروع من كدة إحساس

بصراحة لما بمر بأشعارك بحس أحساس غريب

بجد إنت بتصور الحدث لينا بكل بساطة وسهولة

ومهما شرحت لك مش هعرف أوصفلك إحساسي وانا بمر على أشعارك

فأتمنى إنك متحرمناش من حكياتك بكلماتك الجميله

دمت بكل ود وتقبل مروري المتواضع

مع أرق تـــــ ح ــــــياتي

الاخ الكريم
طائر على الطريق
اشكرك جدا جدا
على كلماتك الرقيقة الحميلة
والتى تبعث الامل فى النفوس
انقطاعى من اجل معرض الكتاب
ارجو المعذرة
سأعود قريبا ان شاء الله
اكرم عبد السميع

اية دا ياعم اكرم
اية الجمال والقوة فى التعبير
بجد انت رائع
كما رائع قلمك
تقبل مرورى
المراغى

الاخ المراغى
كل الشكر لك
على كلماتك الرقيقه
وشعورك النبيل
تحياتى
اكرم

اشكرك يا اخ اكرم
على كلماتك الرقيقة ذات احساس
عالى ومرهف اتمنى لك
التوفيق فى جميع اعمالك الفنية التى
تسعدنا بها ومشتاقين الى الكثير منها

الاخ العزيز
ابن النيل
كل الشكر والتقدير لك
على مشاعرك الطيبه
مودتى واحترامى
اكرم

» شخصية الأسبوع ( أكرم عبد السميع )
» صور متحركة اسلامية رائعة!!!
» رائعة نزار قباني كاملةً‎
» هذه الطبيعة تدل على خالق مدبر حكيم ....صور رائعة
» حلقة رائعة جدا بعنوان (وقفة للمحاسبه) لفضيلة الشيخ محمد حسان