كان ياما كان ...

كان ياما كان ...

لميت حروف المسأله
وكتبتها عشرين سؤال ..
وعملت وحسة ^([1]) من الخيال
ما قدرش أصدَّق
إن قُلِّة مَيِّتَك طفحِت مرار
من يوم ما جيت ع الدنيا
شارب ميِّتَك
دايماً بتجري جوا شريان التّرع
كان لمّا أعجز إني اطولها بشفتي
أقطع من الفول القسل ^([2])
وأمد قسلة
بين شفايفي .. وشفتّك
تحضن دراعي ميِّتَك
أيامها كانت صافية .. حلوة
تقول عسل
وباحسّها تقتل ف وجداني الكسل
ما كانِتْش حِبلى بالعفن
ولا ريحة الخوف اللي طافح
فوق تضاريس الوطن
يا صاحبي ..
أوعى تقولي : سيبك م اللي فات
دا انا لما ابص في عينها
يدبحني السكات
مش هيَّ دي البنت
اللي كانت تستحي
ولا هيَّ دي الأم
اللي حضنت طفلها لحظة وداع
ليه النهارده ابنها
للحضن باع..
يا صاحبي .. عارف
هتقولي: خليك ف الدِّرَا
واقعد ف حالك
بايع .. بايعشي
إتلهي .. هو انت مالك
لكن ..!!
مين اللي يقدر تنقلع عينه
ولا ما يقُلش آه !!
دانا عمري ساكن عمرها
وجبيني ساجد
فوق بطاطيل ^([3]) الغيطان
ضهري اتحنى ..
والفاس ف إيدي شاربة من عرق التعب
سهر الليالي
فوق مساطيح الدُّرة
فرشة منامي من الحطب
ولحافي كان نور القمر ..
أشرد بعيني في السما
ألقاكي قدّامي
تمدّيلي الدفا
مين اللي بدِّل
طيبة القلب الحنيِّن .. بالجفا
عشرين سؤال
والحيرة غارسة جِدْرَها
جوّا الوريد
يا مين يعيد
حلمي اللي ضايع من زمن
وسط الكلام.

اكرم عبد السميع
البلينا

1) الوحسة: مجموعة كبيرة من عيدان الذرة ، تُخزَّن على الأرض.
2) القسل: جمع قسلة وهي عيدان الفول.
1) بطاطيل: جمع بطال ، وهو الحد الفاصل بين الغيطان.

السلام عليكم شاعرنا أكرم عبد السميع

الفاظك نغم يعيشنا في ماضينا المجيد

ويبدعنا ويطربنا

إفتقدناك والله ونتمنى عودتك مره أخرى

مشكور ياشاعرنا العظيم الذي تنساب كلماته وتدغدغ المشاعر اتحفنا كمان ياابن البلينا علشان يبقي عندنا بليناوي مثل شاعرنا الكبير الابنودي وفقك الله

الاخ الكريم
على عياط
اشكرك كثيرا
على كلماتك الرقيقه
اما عن انقطاعى فسببه
معرض الكتاب
سأعود قريبا ان شاء الله
اكرم عبد السمبع

الاخ الكريم
ابو بهادر
اشكرك جدا
على كلماتك
واحساسك الجميل
دمت بخير
اكرم عبد السميع