امثال شعبية

موضوع: امثال شعبية الأحد مايو 24, 2009 3:09 pm

أرقص للقرد في دولته
· من خاف سلم
· اربط الحمار مطرح ما يريد صاحبه
· أردب ما هو لك ما تحضر كيله
· اللي يتجوز أمي أقوله يا عمي
· خراب يا مصر عمار يا دماغي
· شيلني وأشيللك
· اشهد لي بكحكة أشهد لك برغيف
· إن جالك الطوفان حط ولادك تحت رجليك
· إن كان ليك حاجة عند الكلب، قوله يا سيدي
· اللي مش محتاج وشه النهاردة بكرة تحتاج لقفاه
· أبعد عن الشر وغني له
· ما ينوب المخلص إلا تقطيع دومة
· يا داخل بين البصلة وقشرتها ماينوبك إلا صنتها
· إن فاتك الميري أتمرغ في ترابة
· خالتي وخالتك واتفرقت الخالات
· أحبك أحبك، لكن اكتر من روحي لا
· أبو بلاش كتر منه
· ياللي رايح كتر من الفضايح
· اللي يعرف ابويا يروح يقول له
· علشان الورد يتسقي العليق
· اللي تغلب به ألعب به
نجد فيهاالشخصيةالانهزامية والمنسحقة المتواكلة والتي تتفه الطموح
· تروح فين يا صعلوك بين الملوك
· العين متعلاش على الحاجب
· الميه متطلعش في العالي
· اللي يبص لفوق يتعب
· اللي ملهوش كبير يشتري له كبير
· اللي ليه ضهر ما ينضربش على بطنه
· أجري جري الوحوش غير رزقك لم تحوش
· اللي أنكتب على الجبين لازم تشوفه العين
· بعد ما طارت ساعدها بقولة هش
· بعد ما شاب ودوه الكتاب
· من فات قديمة تاه
· اصرف ما في الجيب ربك يرزقها من الغيب
· الدنيا اتخلقت في سبع تيام
· المصري حلنجي وفهلوي وياكلها ولعة
وهي مزيج من سمة التحايل وسمة التكيف الذي تمتع بها المصري كرد فعل لسنوات للكبت والتهميش، ونجد في الامثال الشعبية ما يشير لذلك
· ميقعش إلا واقف
· يعدي البحر ولا يتبل
· يتمسكن لحد ما يتمكن
· يفهمها وهي طايرة
لكن نجد أيضا العديد منها يعكس شخصية متوازنة عملية تمجد على العمل والسلوك الإيجابي
· أسعى يا عبد وأنا أسعى معاك
· إن مال عليك الزمان ميل على دراعك
· امشي عدل يحتار عدوك فيك
· يصلي الفرض وينقب الأرض
· من اخد الأجرة حاسبة ربنا على العمل
· اللي يتكسف من بنت عمه ميجبش منها عيال
· هلا هلا على الجد والجد ههلا هلا عليه
· الإيد البطالة نجسة
· الخسارة القريبة ولا المكسب البعيد
· اللي يحسب الحسابات في الهنا يبات
· جحا أولى بلحم طوره
· إدي العيش لخبازة ولو أكل ثلاث أربع
· اللي يحتاجه البيت يحرم على الجامع
· القرش الأبيض ينفع في اليوم الأاسود
· على قد لحافك مد رجليك
· اللي يريدك ريده ومن خيرك زيده
· اللي باعك بيعه
تجد ايضاً الشخصية الجدعة التي تمجد التعاون والعشرة
· العشرة متهونش إلا على ولاد الحرام
· جنة من غير ناس تنداس
· لولا جارتي كانت انفقعت مرارتي
· من قدم السبت لقى الحد قدامه
· أيد على إيد تساعد
· الإيد لوحدها متسقفش
· القفة أم ودنين يشيلوها اتنين
· ربك وجارك داري بحالك
· الجار للجار
· الجيران لبعضيها
· الجار قبل الدار
· يا بخت من وفق راسين في الحلال
· اعمل الخير وارميه البحر
· ما محبة إلا بعد عداوة
· بصلة المحب خروف
· لقمة هنية تكفي مية
· جحر ديب يساع ميت حبيب
نجدها أيضاً تعكس شخصية خصبة على وعي عالي بالصراع الطبقي
· إن طلع من الخشب ماشة يطلع من الفلاح باشا
· يفتي على الابرة ويبلع الدرة
· إن شفت الفقير بيجري اعرف أنه بيقضي حاجة للغني
· أبن مين الي محمول؟ ابن اللي عندها ماكول ابن مين اللي ماشي؟ ابن اللي معندهاشي
· إذا غني أكل حية ، قالوا: من حكمته وإذا فقير أكلها، قالوا: من حموريته
· خدوا من فقرهم وحطوا على غناهم
· أبو ميه بيحسد أو لبنية
· إيه اللي رماك على المر قال اللي أمر منه
· كنت فين يا " لأ" لما قلت أنا: أه
· عشمتني بالحلق خرمت انا وداني
· جت الحزينة تفرح ملقتلهاش مطرح
· الكحكة في إيد اليتيم عجبة
· حسدوا الغجر على ضل السجر
· قليل البخت يلاقي العضم في الكرشة
· باب الحزين معلم بطين · ياما دقت على الراس طبول
· يا قلبي يا كتاكت يا ما أنت شايل وساكت
· إيه اللي رماك على المر، إللي أمر منه
· الصبر طيب
· اصبر تنول
شخصية مؤمنة بالقضاء والقدر فاضلة ملتزمة بالعرف
· حب بجنون من غير مأذون يفتح الله
· إديني عمر وارميني في البحر
· الله جاب، الله خد، الله عليه العوض
· ابن آدم ما يملاش عينه إلا التراب
· خدوهم فقرا يغنيكم ربنا ... ولقد زادت العقلية الحديثة على المثل الأخير روح التهكم فأصبح: خدوهم فقرا تشحتوا سوا
شخصية واعية بدور السلطة وناقد لها
· يا فرعون، إيش فرعنك؟ قال: ملقيتش حد يقف يصدني
· حاميها حراميها
· سلموا القط مفتاح الكرار
· قالوا للحرامي أحلف، قال جالك الفرج
· يبني قصر ويهدم مصر
· أخر خدمة الغز علقة

موضوع: رد: امثال شعبية الإثنين مايو 25, 2009 1:21 am

أبن النيل

ايه ياعم قاموس الأمثال ده

ههههههههههههههه

فكرتني بجدتي الله يرحمها كان كل كلامها امثال

بس كانت أمثال عباره عن حكم ومواعظ مش زي اليومين دول

الأمثال بقت عبارة عن تفريغ شحنة الكبت جوا كل إنسان مصري

وربنا يستر على الشباب

وعلى رأي المثل

إجري يا إبن أدم جري الوحوش إن كبر إبنك خويه

هههههههههههههههههه

تقبل تحياتي

موضوع: رد: امثال شعبية الإثنين مايو 25, 2009 4:55 am

ابن النيل فكرتني بجدة طائر الله يرحمها

هههههههههههههه

بس لي تعليق على المثل
· يا مستعجل يعطلك الله

عمر ربنا ما بيعطل حد فيريت تحذف المثل ده

وانا قريتها لشيخ مش فاكره اسمه كان موضوع " ألفاظ تخالف العقيدة "

تمنياتي لك بدوام الحكمة

على فكره انا ما أعرفش طائر ويريت تقبلوا مروري انتوا الاتنين

إبن النيل

تحياتي وتقديري عذراً لقد تم حزف مثل من الأمثله

لأنه من الأقوال المخالفة للعقيدة

وهو ( يا مستعجل عطلك الله ) واشكر الأخت
ELSHAKRAA
على التنبيه لمثل هذه النقطة وانا فعلاً مخدتش بالي

وبعدين أنا أعرف الشقراء جدتها كانت زميله جدتي في الكُتاب زمان
هههههههههههههههههههههه

وعلى رأي المثل
من خرج من دارة اتقل مقدارة

ههههههههههههه

مع أرق تــــ ح ــــياتي

طــــ على الطريق ــــائر

اشكركم اخوانى على مروركم الطيب

موضوع: رد: امثال شعبية الجمعة مايو 29, 2009 6:06 pm

لا فعلا تستحق لقب ابن النيل
بجد انت فكرتنى بالناس الكبيرة بتاعة زمان
الناس اللى تشعر انها قواميس غير مخطوطة
بجد رائع ولا تتوقف

موضوع: رد: امثال شعبية السبت مايو 30, 2009 1:41 am

جميله جدا الامثال امثال شعبية 540912450

حاجة جميلة
والأمثال الحقيقة من الأشياء الجميلة البيمتاز بيها عالمنا العربي ومصر خاصة

موضوع: رد: امثال شعبية السبت أغسطس 08, 2009 1:21 am

[img]

[/img]