خلف الانسان
قصيده تجسد شخصيه حقيقيه
فى قرية
نجع مازن غرب
خلف الانسان
حدوته ف كل بيوت النجع
فزوره تحير كل الناس
أتشعبط على سلم عمره
واسمع حكاويه
وكلامه المتلخبط
لكن …
مليان احساس
يضحك …
مع ان الهم معشعش
جوا وريده
وبايده يسلم ع الايام
ويقطع كل جدور الخوف
لو تتأمل لهجة حسه
تسمع منه حكاوى زمان
خاف الانسان
مليااااااااااااان
يمشى ف طقاطيق الشمس
والقياله …
تحفر جوا العراقيب
سراديب
تتسلل فيها اوجاع وهموم
وتشوف عنيه
تتأمل كل حكاوى الناس
وكأنه ف باله يقول:
ماخلاص !!
الفرح اتكتف بالاحزان
وزمان
مش ممكن يرجع من تانى
فى الخطوه …
يطير
يغزل من عفش الارض
سرير
خلف الانسان
ف ايامنا … أمير
تتشقلب حوليه الايام
وينام
لا يهمه رغيف العيش بكام
ولا حد يعكنن أحلامه
وكأنه الملك
وكل الناس
حوليه خدام
خلف الانسان
حجيوه ف كل ليالى النجع
وطريق مترصف بالاوجاع
يركب على سلم اسرارنا
ويشوف _ بسهوله _
فى حياتنا
كل الاوضاع
كاتم اسرارنا
ولا يمكن بالسر يبوح
مع ان حياتنا مكشوفه
ويوماتى علينا
البوم … بينوح
خلف المجروح
مع ان الدنيا
فوق راسه
والالم مصاحبه
وهواسه
لكنه طموح
***
أكرم عبد السميع
سوهاج _ البلينا _ نجع مازن غرب