على باب سفارة كندا

على باب سفارة كندا.. لمحت ابليس و ف ايده استماره..

بقول له على فين.. قاللي بص .. يا هجره يا اعاره..

يا عم زهقت.. كفرت .. الاقيش معاك سيجاره..

انا انتهيت خلاص .. لا نافع وسواس ولا خناس

ولا ليا عيش وسط الناس..

دي عالم مجرمين.. عندكوا فائض ف الفساد..

في كل البلاد..

ومش محتاجين شياطين .. مليش عيش ف دي البلاد..

....

بقالي سنين عاطل .

و انتوا بتعرفوا تقلبوا الحق باطل..

و تسلكوا القاتل .. و تمشوا ف جنازة المقتول..

ومفيش مشاكل..

يا عم ده انا بقيت أوسوس بالمقلوب..

و أقول للحرامي .. كفايه بقى .. توووووب..

انت ايه . لوحدك هاتعمل كل الذنوب..

و أنا ابليس أشتغل واعظ .. ولا كمساري ف اتوبيس..

يا عم ده انا زمان

كنت استنى حد ينسى يسمي وهو بياكل لقمته..

دلوقتي كل اكلكم ملوث .. و بصراحه الواحد خايف على صحته..

ده مفيش ضمير اساساً عشان اموته..

و كل واحد بمزاجه .. خربانه ذمته..

يا عم ده كل حاجه اتسرقت..

وكده الاجيال الجديده م الحراميه اتظلمت..

يا راجل ده من كتر ما لطشت معايا..

خرجت ف مظاهره مع الناس اللي بتقول كفايه..

و برضه ......... مفيش فايده

يعني ابليس رايح كندا

وهي كندا افضل مننا في ايه؟

أكيد الوضع واحد والضمير واحد يمكن عندنا الوازع الديني بيشتغل شويه ويفصل شوية

لكن هناك لا في وازع ولا فيه دين

يعني الوضع هيكون اسوأ

قولي لأبليسك يخليه هنا ويرضى باللى قسمه ليه ربنا وعلى الاقل اللى يعرفه احسن من اللى يعرفهوش ولسه هيروح ويتعلم كندي وياكل أكل كندي ويعيش في جو كندي اكيد هيتعب

كل تحياتي يا ادفاوية

يعني هو الفول اللي حلو و لا اللحمة اللي .............. و لا بلاش الستر احسن

بس انا لو اقدر اكلم ابليس و اتفاهم معاه ما كانش حد غلب

ميرسي طبعا على مرورك و اتمنى دايما تشرفني في مواضيعي

فعلا اختى ابليسك ده طماع ليه هوه ايه اللى مش عاجبه عندينا
تعب ودخل مستشفى ملقيش رعايه ولا عاوز يتعالج على نفقه الدوله
مش كفيانا الروس الكبيره كمان ابليس بيعدل علينا
يجى بلادنا ياخد درس او نجيبله مخبر ياخدو كنس
بلاش احسن علىشان المدير ما يزعل مننا
كل التقدير اختى على المجهود والحدق يفهم

استاذ محمود على مرورك
بس انا مافهمتش

معلش خدني على قد عقلي و فهمني